सहिद स्मारक ‘ए’ डिभिजन लिग फुटबलमा आज तीन वटा खेल हुँदै
काठमाडौं । सहिद स्मारक ‘ए’ डिभिजन लिग फुटबलमा आज तीन वटा खेल हुँदैछन् । लिगको दोस्रो चरण अन्तर्गत आज च्यासल मैदानमा एउटा र दशरथ रङ्गशालामा दुई वटा खेल हुनेछ।
च्यासल मैदानमा दिउँसो साढे दुई बजे एपीएफ र सातदोबाटो तथा दशरथ रङ्गशालामा दिउँसो साढे दुई बजे पुलिस र हिमालयन शेर्पा खेल्दैछन् । त्यस्तै बेलुका साढे ५ बजे दशरथ रङ्गशालामा मनाङ मस्याङ्दी र संकटाबीच खेल हुनेछ ।
नारी दिवसका अवसरमा आजका खेलमा महिला दर्शकलाई निःशुल्क प्रवेश दिइने भएको छ । ‘ए’ डिभिजन लिगमा हिजोदेखि दोस्रो चरणका खेल सुरु भएका हुन् । यस सिजनको ‘ए’ डिभिजन लिग डबल राउण्ड रोबिनको आधारमा भैरहेको छ ।
यस पटकको लिगमा कुल १ सय ८२ खेल हुनेछन् । यस पटकको लिग विजेताले ७५ लाख, दोस्रो टोलीले ५० लाख र तेस्रो हुने टोलीले २५ लाख रुपैयाँ पाउनेछन् ।