सहिद स्मारक ‘ए’ डिभिजन लिग : शीर्ष स्थानको जावलाखेल र संकटाको खेल बराबरीमा
काठमाडौं । सहिद स्मारक ‘ए’ डिभिजन लिगअन्तर्गत शीर्ष स्थानको जावलाखेल युथ क्लबले संकटा क्लबसँग १–१ को बराबरी खेल्दै अंक बाँडेको छ । आइतबार सातदोबाटोस्थित एन्फा कम्प्लेक्समा भएको खेल बराबरीमा सकिएको हो ।
योसँगै जावलाखेल १३ खेलबाट २४ अंक जोड्दै शीर्ष स्थानमा यथावत् छ । समान खेलबाट १६ अंकको संकटा अंकतालिकाको नवौँ स्थानमा छ ।
शनिबार च्यासल मैदानमा हुने तालिका रहेको यो खेल वर्षाका कारण रोकिएको थियो । शनिबार ५१औँ मिनेटपछि खेल आजका लागि सारिएको थियो । ५१औँ मिनेटपछिको खेल एन्फा कम्प्लेक्समा गरिएको हो ।
शनिबार ३४औँ मिनेटमा फोडे फोफानाको गोलबाट जावलाखेलले अग्रता बनाएको थियो । आइतबार ७३औँ मिनेटमा मनीष डांगीले बराबरी गोल फर्काएका हुन् ।