मउवा संघको उद्योग उपाध्यक्षमा घिमिरेको उम्मेद्वारी घोषणा

मकवानपुर । आगामी पुष २७ गते हुने मकवानपुर उद्योग वाणिज्य संघको आसन्न निर्वाचनमा उद्योग तर्फको उपाध्यक्ष पदमा रविन्द्र घिमिरेले आफनो उम्मेद्वारी घोषणा गरेका छन् । हेटौंडा उपमहानगरपालिकाको खेलकुद विकास समितिको अध्यक्ष समेत रहेका घिमिरे अध्यक्ष पदका उम्मेद्वार अनिल अग्रवालको प्यानलबाट उपाध्यक्ष पदमा उम्मेद्वार रहने भएका हुन् ।

घिमिरेले उम्मेद्वारी फिर्ता लिन्छ भन्ने हल्ला बजारमा चलेको र त्यस भ्रमलाई तोड्न पत्रकार सम्मेलन मार्फत आफुले उम्मेद्वारी घोषणा गरेको उनले बताए । ‘म सधैं साना व्यवसायीहरुको माझ रहेर काम गर्नेछु । बजार आन्दोलन देखि व्यवसायीहरुको हरेक समस्यामा मैले सधैं साथमा रहेर काम गरेको छु’ । उनले भने ।

उनी यस अघिको निर्वाचनमा समेत झिनो मतान्तरले पराजित भएका थिए । उनी २०५२ सालदेखि सरल निर्माण सेवाबाट व्यवसायिक सेवामा सक्रिय रहेका छन् ।

यस्तै उद्योग तर्फबाट सदस्यहरुमा दिपक शिवाकोटी, राजकुमार बानियाँ, कृष्णगोपाल महर्जन, महिला सदस्यमा मेनका श्रेष्ठ उम्मेद्वार रहेका छन् ।