लामसुरेको नालामा मृत भेटिए हेटौंडा–१३ का बल
मकवानपुर । हेटौंडामा एकजनाको शव फेला परेको छ । हेटौंडा–९ लामसुरेस्थित हेटौंडा सिमेन्ट उद्योगको मोडको नालामा वुधबार साँझ एक पुरुष मृत भेटिएका हुन् । हेटौंडा–१३ बस्ने अन्दाजी ६२ वर्षीय मीन बहादुर बलको शव फेला परेको जिल्ला प्रहरी कार्यालय मकवानपुरले जनाएको छ ।
बलको शव नालामा घोप्टो परेको अवस्थामा भेटिएको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक श्यामु अर्यालले जानकारी दिए ।
इलाका प्रहरी कार्यालय पशुपतीनगरमा खबर प्राप्त भएपछि प्रहरी निरीक्षक बिमला कुमारी कठायतको नेतृत्वमा एक टोली घटनास्थलमा खटिएको थियो। थप अनुसन्धानका लागि जिल्ला प्रहरी कार्यालयबाट प्रहरी निरीक्षक ठाकुर प्रसाद सापकोटाको कमान्डमा अर्को अनुसन्धान टोली पठाइएको छ।
प्रारम्भिक अनुसन्धानपछि मृतकको शव पोष्टमार्टमका लागि हेटौंडा अस्पतालको शव गृहमा राखिएको छ। घटनाको थप अनुसन्धान जारी रहेको प्रहरीले जनाएको छ।