हेटौंडामा आठौं राष्ट्रिय भेट्रान्स फुटबल प्रतियोगिता हुने
हेटौंडामा आगामी पुसको तेस्रो साताबाट आठौं राष्ट्रिय भेट्रान्स फुटबल प्रतियोगिता हुने भएको छ । उक्त प्रतियोगिता पुस १९ गतेबाट २३ गतेसम्म प्रतियोगिता संचालन हुने भएको हेटौंडा भेट्रान्स क्लबका अध्यक्ष रमेशकुमार उप्रेतीले जानकारी दिए ।
उप्रेतीका अनुसार, प्रतियोगिता हेटौंडा उपमहानगरपालिका वडा नम्वर ५ स्थित पिप्लेक्याम्पा रंगशालामा संचालन हुनेछ । प्रतियोगितामा देशभरका २० टोलीले सहभागी जनाउनेछ ।
प्रतियोगितामा मकवानपुर, चितवन, वीरगञ्ज, बारा, नवलपरासी, पोखरा, काठमाडौं र विराटनगरलगायतका जिल्लाका विभिन्न क्लबहरु सहभागी हुने अध्यक्ष उप्रेतीले बताए । साथै उनले सम्भव भएसम्म भारत र बंगलादेशबाट पनि टोली ल्याउनले तयारी भइरहेको जानकारी दिए ।
प्रतियोगिताको विजेताले नगद १ लाख ११ हजार, उपविजेताले ५५ हजार ५ सय रुपैयाँ प्राप्त गर्नेछन् । यस्तै, म्यान अफ दी सिरिजलाई १५ हजार, उत्कृष्ट प्रशिक्षक, गोलकिप्पर, डिफेन्डर, मिडफिल्डर र फरवार्डलाई जनही ५ हजार रुपैयाँ प्राप्त गर्नेछन् ।