बुधबार सुनको मूल्य तोलामा ८ सयले वृद्धि

काठमाडौं । नेपाली सुनचाँदी बजारमा आज छापावाल सुनको मूल्य अघिल्लो कारोबार दिनका तुलनामा प्रतितोला ८०० रुपैयाँले उकालो लागेको छ । मंगलबार प्रतितोला एक लाख ४०० मा कारोबार भएको सुनको मूल्य आजका लागि प्रतितोला एक लाख एक हजार २०० रुपैयाँ तोकिएको हो ।

नेपाल सुनचाँदी व्यवसायी महासंघले सार्वजनिक गरेको विवरणानुसार आज तेजाबी सुनको मूल्य प्रतितोला एक लाख ७०० रुपैयाँ छ । यसको मूल्य अघिल्लो दिन तोलाको ९९ हजार ९०० थियो ।

यस्तै, चाँदीको मूल्य अघिल्लो कारोबार मूल्यका तुलनामा २५ रुपैयाँले वृद्धि भई प्रतितोला एक हजार ४०० रुपैयाँ पुगेको महासंघले जनाएको छ ।

महासंघले अन्तर्राष्ट्रिय बजारमा हुने सुन तथा चाँदीको कारोबार मूल्यका आधारमा यहाँ दैनिक मूल्य तोक्दै आएको छ । हाल अन्तर्राष्ट्रिय बजारमा सुन प्रतिऔँस एक हजार ८१३.४ अमेरिकी डलर आसपासमा कारोबार भइरहेको जनाइएको छ । रासस