बागमती गोल्डकपको दोस्रो खेलमा आज मकवानपुर–११ र नेपाल पुलिस क्लबबीच खेल हुने
बागमती । मकवानपुरको बागमती गाउँपालिकामा आइतबारबाट सुरु भएको बागमती गोल्डकप फुटबल प्रतियोगिताको दोस्रो खेलमा आज समूह (ख) बाट मकवानपुर –११ र नेपाल पुलिस क्लबबीच खेल हुने भएको छ ।
फापरबारीस्थित जनता माविको खेल मैदानमा दुई टोलीबीच दिउँसो २ बजे प्रतिस्पर्धा हुनेछ । आज विजयी हुने टिम सेमिफाइनलमा प्रवेश गर्नेछ ।
गोल्डकपको उद्धघाटन खेलमा आइतबार आयोजक टिमलाई ५–० गोल अन्तरले हराउँदै जावलाखेल युथ क्लब सेमिफाइनलमा प्रवेश गरिसकेको छ ।
पाँचौ संस्करणको गोल्डकप विजेताले ८ लाख र उपविजेताले ४ लाख नगद पुरस्कार प्राप्त गर्नेछन् । प्रतियोगिता माघ ४ गतेसम्म सञ्चालन हुनेछ ।